Najayaz Aulad

10 min read

Author : Phulwa

Aaj jo kuch bhi hua, uski umeed Meenakshi ko sapne mein bhi nahin thi, Aaj uske vidyalaya ki chutti jaldi ho gayi to usne apne bete Ankur ko bhi uske college se chutti dila kar bazzar jaane ka socha isliye wah college ke Principal se Ankur ki chutti swikrit karaane gayi ki usne dekha ki Principal to Aashish hai.

Meenakshi ko maloom nahin tha ki Aashish Roorkee mein hi rehta hai aur Ankur ke college ka Principal hai.

Aashish bhi Meenakshi ko apne saamne khada dekh kar chounk gaya, Badi kathinai se uske mukh se nikla- Aao Meenakshi, Baitho, Kaisi ho?

Meenakshi ne kaha- Theek hoon… Apne bete Ankur ko chutti dilaane aayi hoon. Tum kaise ho? Kab se aaye is college mein?
Aashish ne chapraasi ko Ankur ko class se bulane bhej diya.

Meenakshi Aashish Sir se baat kar rahi thi ki usi samay Ankur room mein ghusa, Use dekh kar Aashish Sir bole- Yeh tumhara beta hai? Tabhi…

Aashish ke baat aage badhaane se purva hi Meenakshi ne ishaare se use rok diya parantu Principal Sir ke ye shabd ‘yeh tumhara beta hai? Tabhi…’ Ankur ke kaan mein pad gaye, Us samay to Ankur kuch nahin bola par gate se bahar aate hi Mom se pooche bina nahin raha- Mom, Main aapki aur Aashish Sir ki najayaz aulad hoon?

Meenakshi Ankur ke us prashn se bachna chahti thi jo usne gate se bahar aate hi daag diya tha, Wah bina koi uttar diye chalti jaa rahi thi.

Jab uske bagal se ek auto guzra to use rok kar Ankur ko lagbhag kheenchte huye auto main baith gayi. Use pata tha ki uska Beta auto waale ke saamne kuch nahin bolega.

Auto mein chup baitha Ankur ghar pahunchte hi bol pada- Mom, Aap jawaab nahin de rahi ho jabki mere dost mujhe chidhaate hain, kehte hain ki ‘tu bhi Meerut ka aur Sir bhi Meerut ke aur tera chehra aur chaal dhaal sab Aashish sir se milta julta hai.. Kahin teri Mom aur Sir ke beech koi chakkar to nahin tha?

‘Aur aaj Aashish Sir ke shabd ‘yeh tumhara beta hai? Tabhi…’ To kya main aapki aur Sir ki najayaz aulad hoon?’

Meenakshi uski baat ko taalte huye boli- Jab tu pet mein tha tab tere Sir ke parivaar ke hamaare parivaar se ghanishth sambandh thay, Ghar mein bahut aana jaana tha, Isliye!

‘Mom, Aapne mujhe bachha samjha hai? Main Sir se hi pooch loonga!’ Keh kar Ankur wahan se chala gaya.

Meenakshi ne use roka nahin kyonki use pata tha, Ankur jo soch leta hai, Karta hai.

Ankur kuch nashta karke apne kamre mein aakar let gaya, TV chala liya parantu uska priya program bhi use shaanti nahin de paa raha tha… ‘yeh tumhara beta hai? Tabhi…’ Ye shabd hi uske kaanon mein baar baar goonj rahe thay.

Tabhi uska phone baja, Usne phone uthaya, Uske dost Ekansh ka phone tha- Tu kab college se ghar aaya?

Idhar udhar ki baatein karne ke bajay Ankur ne seedhe hi pooch liya- Tu Aashish Sir ka ghar jaanta hai?

‘Kyon? Kya tu bhi Sir se tuition padhan chahta hai? We bahut achha padhate hain lekin tera koi subject to Sir padhate nahin hai, Phir tu…?’

‘Tujhse jitna pooch raha hoon- Utna hi bata, Mujhe kuch kaam hai, Tu pata bata de bas…’

‘Aisa kar, Civil lines mein gali mein dayin or doosra hi ghar hai, Unke naam ki plate bhi lagi hai.’

Ankur ne phone rakh diya aur apni Mom se bola- main Ekansh ke ghar jaa raha hoon, Ek ghante mein aa jaunga.

Kuch hi der mein Ankur Aashish Sir ke ghar pahunch gaya, Wah pehle thoda jhijhka, Phir ghanti baja di.

Darwaza Sir ne hi khola, Ek moment ko wah Sir dekhta hi raha kyonki aaj use Sir doosre hi roop mein dikhai de rahe thay aur phir use apna yahan aane ka purpose yaad aaya aur Sir ke kuch bolne se pehle hi wah bol pada- Sir, Kya main aapki aur Mom ki najayaz santan hoon?

Aashish ko shayad aise sawaal ki umeed nahin thi, Usne kaha- Dekho beta, Aisi baatein darwaaze par nahin ki jaati, Andar aao, Min tumhaare har sawaal ka uttar dene ki koshish karunga.

Ankur andar aa gaya, Andar Sir ne apni Amma se uska parichay karaya- Amma yeh Ankur… Hai
Meenakshi ka beta!

Sir ki Amma khil uthi- Apni Mummy ko bhi le aate beta!

Unke aur kuch bolne se purva hi Aashish ne apni Amma ko kaha- Amma, ye baatein baad mein ho jayengi, Pehle ise chai nashta to kara do ! Pehli baar ghar aaya hai.

Amma ke chale jaane ke baad Sir bole- Haan, Ab bolo Beta, Kya janna chahte ho?

‘Sir, Main aapki aur Mom ki najayaz aulad hoon?’

‘Dekho beta, Aulad najayaz nahin hoti, Balki sambandh najayaz hote hain… Aur phir mere aur tumhari Mom ke sambandhon ke liye to tumhare Papa ki anumati thi.

Yeh sunte hi Ankur ka mukh khula ka khula reh gaya, Use vishwas hi nahin ho raha tha ki koi itna neeche bhi gir sakta hai… Use samajh nahin aaya ki Papa ki kya majboori ho sakti thi.

Uski pareshaani bhaanp kar Aashish bole- Shaant hokar meri baat suno Beta, Main sab batata hoon! Tumhari Mom ki shaadi sadhaaran shaadi thi, Shaadi ke baad do saal shaadi ki khumari mein nikal gaye aur phir gali mohalle mein kana-phoosi shuru ho gayi ki ghar mein kilkaari kyon nahin goonji?
Phir to tumhare ghar mein bhi aisi baatein sunne ko milti! Tumhare Papa ke dost tana maarne se nahin chooke, Tumhari Mummy Meenakshi ke baanjh hone ki baatein hone lagi aur tumhare Papa ki mardangi par sawaal banne lage. Saath hi, Doctor report ne aag mein ghee ka kaam kiya, Kami tumhare Papa mein mili.
Tumhare Papa office ka gussa ghar mein nikaalne lage. Hamara parivaar tumahre pados mein tha, Tumhari Mom hamare ghar aa jaati, Main tumhari Mom se baat karke unhe dilasa deta, Tumhari Mom koi bachha god lene ko kehti to tumhare Papa naraz ho jaate, Unhe apni mardangi saabit karni thi.
Mere aur tumhari Mom ke beech ghanishthta badhne lagi aur us mukam tak pahunch gayi jiske falswarup tum apni Mom ke pet mein aa gaye
‘Wah din mujhe aaj bhi achhi tarah se yaad hai, Jab main tumhare ghar pahuncha, Tab tumhari Mom ke shabd mere kaanon mein pade, Un shabdon ko sunte hi mere chalte kadam ruk gaye. Tumhari Mom keh rahi thi ‘Lo, Ab tum bhi mard ban gaye… Main garbhwati ho gayi… Ab doston ke saamne tumhari gardan nahin jhukegi.’
Mujhe laga ki main sirf ek hathiyaar tha, Jo papa ko mard saabit karne ke liye prayog kiya gaya tha. Mujhe tumhari Mom par gussa aaya, Socha ki saamne jaakar apni naarazgi jaahir karun lekin phir mujhe tumhari Mom par taras aa gaya, Main waapis ghar aa gaya, Uske baad main kabhi tumhare ghar nahin gaya.
Usi dauran mere Papa ka tabadla ho gaya, Jis din hum jaa rahe thay, Us din tumhari Mom hamare ghar aayi thi wo kuch nahin boli lekin unki chuppi bhi bahut kuch keh gayi, Maine Meenakshi ko maaf kar diya.

Sir ki Amma wahan aa gayi thi, Unhone sab sun liya tha, We bol padi- Beta, Isne khud ko maaf nahin kiya aur ab tak shaadi nahin ki. Tumahri Mom ki khabrein pados ki ek aunty se milti rahin, Tumhara janm hua, Tumhare Papa ne party di lekin kehte hain ki unke chehre par wo khushi dikhaai nahin padi thi jo ek baap ke chhehre par dikhni chahiye thi. Tumhari Mom aur Papa mein jhagda aur badh gaya. Tumhara chehra dekh kar unko pata nahin kya ho jata, Shayad unko apni namardi ka khyal aa jata ya wo heen bhavna se grast ho gaye thay, Tumhari or dhyan nahin dete, Tumhari Mom ke liye tum sab kuch thay, Shayad wo tumhare liye apne ko bhool jaati!

‘Ek din tumhari Mom bathroom mein naha rahi thi, Tum zor zor se ro rahe thay, Tumhare Papa wahin khade thay parantu unhone tumhein chup nahin karaya, Usi samay tumhari Dadi aa gayi, Tumhein zor zor se rote dekh kar we tumhare Papa se boli- Kaisa Pita hai? Ladka roye jaa raha hai aur tu apne kaam mein laga hai, Jaise yeh teri aulad nahin hai?
Tumhari Dadi ke bolte hi we aag-baboola ho uthe, we cheekhe- haan haan, Yeh mera Beta nahin hai, Main to namard hoon

‘Itna keh kar wo ghar se nikal gaye aur phir kewal unki maut ki khabar aayi ki unhone Khatauli ki nahar mein kood kar suicide kar li.
Kuch din ke baad tumhare Mama, Tumhari Mom aur tumko le kar Roorkee chale aaye.

Baat gambheer ho chuki thi, ek tikshn chuppi whan cha gayi thi, Wo chuppi Ankur ne hi todi- Sir, Hum donon kaafi akele hain, Aap bhi kabhi akele ho jaaoge, Isliye aap aur Mom apne un najayaz sambandhon ko jayaz nahin bana sakte?

‘Pagle, Ab hamari shaadi ki umra thode hi reh gayi hai, Ab to tere future ka sochna hai.’

‘Lekin Sir, Aap se milne ke baad maine Mom ke chhehre par alag chamak dekhi thi aur ab jab aapne ghar ke darwaaze par mujhe dekha to aapke chhehre par bhi wahi chamak main mehsoos ki.’

‘Bahut bada ho gaya hai tu aur tu logon ke chhehre ko padhna bhi jaan gaya hai.’
‘Please Sir….’

‘Tu ek taraf to mujhe Papa banana chahta hai aur doosri or Sir- Sir bhi kare jaa raha hai? Papa nahin keh sakta?’

‘Sorry, Papa….’ Kehte huye Ankur Aashish se lipat gaya, Amma ne uske sir par haath pherte huye kaha- Chal beta, Teri Mom ke paas chalte hain.

Ankur ne unko rok diya- Pehle main Mom se baat kar loon!

Amma boli- main teri Mom ko jaanti hoon wah raaji ho hi jayegi.

‘Haan, Dadi, Mom meri khushi ke liye kuch bhi kar sakti hai.’

Ankur wapas ghar jaane ke liye uth khada hua, Aashish use chhodne aa gaye, Udhar Meenakshi ankur ke liye chintit ho rahi thi, Darwaaze ki ghanti baji, Darwaaza kholne par saamne Ankur hi tha.

Meenakshi zor se cheekhi- Kahan reh gaya tha?

‘Papa ke pa!’

‘Tere Papa to mar chuke hain.’

‘We mere Papa nahin thay, We aapke pati thay… Aur phir wo to pati kehlane ke layak bhi nahin thay kyonki we tan se hi nahin man se bhi napunsak thay, Jo apni patni ko paraye mard ke saath sone ko prerit karta hai matra isliye ki duniya ke samne khud ko mard dikha sake! Apne ko mard dikhaane ke liye patni dwara bachha god le lene ke vichaar ko bhi na sune!’

‘To itna zeher bhar diya Aashish ne? Mujhe usse yeh umeed nahin thi.. Main isliye chup thi ki yeh sun kar tu mujhse bhi ghrina karne lagta….’

‘Mom, Main aapse ghrina karunga? Aapne jis tarah mera palan-poshan kiya hai, Us par mujhe garv hai ki aap meri maa ho…. Papa bhi aise nahin hai.

Phir kuch samay tak chuppi chhai rahi, donon ek doosre ko dekhte rahe, Phir Ankur bola- Mom, Aap aur Papa Sir apne najayaz sambandhon ko jayaz nahin bana sakte? Mom, Papa Sir ko pata hai main unka Beta hoon par we mujhe nahin keh sakte, Main jaante huye bhi unko Papa nahin keh sakta aur aap mere samne khokhli hansi hansogi aur akele mein rowogi.

‘Lekin beta, Log kya kahenge?’

‘Unki chinta mujhe nahin hai, Mujhe aapki chinta hai. Main padhai ke liye pata nahin kahan jaunga, Aap akeli reh jaogi aur Dadi Amma kitne din ki mehman hain, unke baad Papa bhi akele ho jayenge.’

Meenakshi vicharmagan ho gayi.

Is Kahani Ko Hindi mein padhne ke liye yahan click karen…

Written by

guruji